Xhafa me “çunat” e la Europën 2-3 ditë pa kokainë

Për të qënë të drejtë me Fatmir Xhafën dhe “policinë, që po pastrojmë“, kapja e një sasie rekord kokaine është për tu lavdëruar. Edhe pse kronika e zezë në këto 6 muaj në Shqipëri ka qënë e mbushur me ngjarje nga më të rëndat. Por me që po flasim për kapjen e kokainës le t’i urojmë ata , që merren me këtë punë t’i shkojnë hetimeve deri në fund.

Po t’ju hedhësh një sy të shpejtë shifrave, më tepër se sasia e madhe e parave (gjithmonë na bëjnë të zgurdullojmë sytë këto të shkreta miliona) ajo ç’ka të tremb më shumë është fakti, se sasia e kapur e kokainës do i mjaftonte gjithë konsumatorëve të Europës për 2-3 ditë!

91 ton është konsumi vjetor i kokainës në kontinentin europian.

Dhe 1/150 e saj u kap në një aksion të vetëm (sipas Ramës pa ndihmën e shërbimeve të huaja) në një aksion të zakonshëm, pa shoqëruesa të armatosur nga pala pritëse e drogës, por vetëm me dy tre 25 vjeçarë, të cilët “dinin se transportonin banana”?! Me një lehtësi të ]uditshme vepronin transportuesit, gjë që dëshmon se ishte një mënyrë e përdorur edhe shumë herë të tjera dhe “lojtarët e vegjël” ishin të sigurt , që nuk do ju hynte gjëmb në këmbë.

Transportimi i sasive të mëdha të kokainës me konteinera, është bërë në këto 10 vitet e fundit, mënyra më e përdorshme nga trafikantët. Por sigurisht, për të zbritur nga deti në tokë ju duhen porte të garantuara dhe vende magazinimi po aq të garantuara. Askush nuk rrezikon milionat e dollarëve në portet e shteteve ku policia funksionon mirë edhe pse në ato vende janë konsumatorët më të shumtë të kokainës. Përjashtime bëjnë vetëm portet gjigande të Roterdamit dhe Hamburgut, ku është thuajse e pamundur të skanohen milionat e konteinerve.

Shifrat e bëjnë të qartë dhe të frikshme nga , që Shqipëria përbën sot një nga pikat kryesore hyrëse të kokainës nga Kolumbia në Europë. Para kësaj sasie të kapur, kanë kaluar dhjetra të tjera më të vogla, që kanë garantuar porositësit se “rrjeti shqiptar” funksionon mirë dhe është i garantuar nga një pjesë e policisë dhe politikanëve me pushtet.

Kokaina e kapur, ashtu si parcelat e mëdha me kanabis të vitit 2016, janë dëshmues se qeveria ka lënë në mënyrë të ndërgjegjshme trafikun e drogës, jo vetëm si mjet për të blerë zgjedhjet, por edhe si “ndihmës” të ekonomisë së vendit. (Pa lënë mënjanë këtu milionat që shkojnë drejtpërdrejt në xhepat e ofiqarëve.)

Pastrimi “si me magji” i fushave me kanabis, si dhe kapja e “megasasisë“ së kokainës, tregon, se kur detyrohet nga Amerika dhe Bashkimi Europian të funksionojë si një administratë normale, kjo administratë mund të kryejë rolet e saj bazë.

Pikërisht për këtë, kjo qeveri duhet vënë para përgjegjësisë dhe në është e mundur të rrëzohet.

Ne nuk mund të jemi një nga vendet më të vogla dhe më të varfra dhe të kemi një peshë të tillë në trafikimin e drogës.

Llogjika “se kokainë do konsumohet gjithnjë, ndaj pse mos futim ne ca para në xhepa” është një logjikë kriminelësh.

Me këtë damkë në ballë nuk kemi për tu pranuar ndonjëherë në Europë.

Për fat të keq, kjo është damka që na ka vënë Rama, Tahiri dhe shokët e tyre.