Sa pak ndryshim!

Pashë këtë foto të National Geographic, gjë që nuk e kam parë në vitet që kam jetuar në Shqipëri, por menjeherë mendja më shkoi në Edi Rama. Nuk më shkoi tek askush tjetër dhe jo nga brekushet që ka katundari i Shqipërisë së Mesme, që i prin karvanit me gra të ngarkuara me ushqim për bagëtitë.

Edi Rama është shqiptari tipik, që i do gratë për t’i shfrytëzuar!

Eshtë tamam si një udhëheqës, që nuk mban gjë në kurriz, por i prin karvanit me ministresha të ngarkuara. Qeveria, pikërisht se Rama është një anadollak i maskuar, ka më shumë gra se burra.

Gratë e ngarkuara me përgjegjësi në qeverinë Rama 3 thuajse nuk bëjnë dot asgjë të rëndësishme pa urdhërin e tij. Dhe të rëndësishme për Ramën janë gjithshka e lidhur me tenderat e mëdha fitimprurëse, të cilat i përdor për të ndihmuar Partinë të rrijë gjithnjë në fuqi, ndihmon xhepin e tij të madh dhe shpërndan edhe në të tjerët që bëjnë punët e pista dhe marrin edhe “plumbat” në rast të një zbulimi të dallaverave.

Narcisist, arrogant, shpërfillës, i pasigurt, intrigant, paranojak, Rama i ka të gjitha cilësitë e duhura për të vënë në punë gratë që i përbuz dhe të cilat nuk i rrezikojnë dot pushtetin brenda Partisë. E di që gruaja shqiptare për shkak të shtypjes tradicionale është më pak e prirur të organizojë komplote për të rrëzuar shefin. Për më tepër, të “katapultuara” në poste pa e ditur se mund të ishin ministre, pjesa më e madhe e tyre ndjehen plotësisht të detyruara t’i shërbejnë “deri në vdekje” mashkullit udhëheqës. Pak a shumë si Lenka Cukot, Themijet dhe Teftat e 40 vjetëve më parë.

Dikush mund të thotë, se në qeverinë Rama ka dhe disa burra ministra. Nuk do i llogarisja si të tillë paloburrat e tipit Cuçi dhe Peleshi, që vërtet janë ngarkuar të na mbrojnë nga armiqtë dhe keqbërësit, por që janë po aq të bindur sa edhe ministreshat e ngarkuara me tagji.

Sigurisht përveç brekusheve të Ramës, shumë gjëra kanë ndryshuar nga kjo foto e vitit 1931. Ministreshat tona ecin me kokën lart, janë të veshura me rroba europiane nga më të shtrenjtat dhe me siguri në vend të brekëve të gjata të shqiptareve në foto, ato mbajnë brazilianka. Por mendësia për të ndjekur pas të përulura mashkullin udhëheqës, që do i përdorë si t’i thotë mendja, nuk ka ndryshuar.

Dhe kjo është tragjedia më e madhe e vendit tim!