Unë në fillim i puth, pastaj…

Kështu tha njeriu më i pushtetshëm në botën e sotme, Donald Trump. E kishte fjalën për gratë. Dhe nuk është sekret, që njerëzit me pushtet i duan shumë gratë. Pa dallim feje, krahine dhe ideje. Mjafton të jenë të reja dhe të bukura. Po qe se dinë edhe dy tre gjuhë të huaja, kjo është një bonus.

Flitet edhe, që pushteti është një afrozodiak i përsosur, por nuk ka ende studime të plota shkencore, në vende të ndryshme, në sisteme të ndryshme shoqërore dhe nivle të ndryshme sociale.

Për shembull asnjë nuk mund t’i japë përgjigje të menjëhershme pyetjes: A të shton menjëherë emërimi në krye të KESH-it oreksin seksual? E mora si shembull sikundër mund të merrja Drejtorinë e Postave, atë të Ujrave, Gjykatën e Apelit, Drejtorinë e Patentave e çdo vend tjetër ku ke shumë vartëse gra dhe jo pak në dorë.

Di një drejtor ferme të kohës së Dullës, që megjithëse rrumbullak dhe i shëmtuar kishte nga një të dashur në çdo sektor dhe kjo jo vetëm nuk e pengonte në punë, por e bënte më të suksesshëm se nuk kishte nevojë të kthehej dhe të flinte në qytet në gruaja.

Pra , si do e argumentonte një mësues filozofije i kohës së Diktaturës, mund të themi se shtimi i oreksit seksual pas ngritjes në detyrë ka karakter objektiv.

(Për ata që nuk kanë studiuar Materializëm Dialektik, të qënit objektiv nuk ka të bëjë me shikimin e grave si objekt, por me faktin , që subjekti burrë me positë nuk e kontrollon dot veten. Nuk është në dorën e tij.)

A ndodh e njëjta gjë kur ngrihen gratë në detyrë?

Për fat të keq, kjo botë është ende bota e burrave dhe gratë me positë janë një dukuri kryesisht e re. Duke patur shumë pak të dhëna statistikore, jo vetëm tek ne, por edhe në botë, nuk mund të themi asgjë rreth kësaj hipoteze.

Për shembulll të gjithë do çuditeshim po të dëgjonim një rregjistrim të gruas më të fuqishme në botë, që në floktore t’i mburrej berberkës “Unë në fillim i puth, pastaj i ze për..!” Jo vetëm që do ishte lajmi më i bujshëm në të gjithë planetin, por Merkelin do e shkarkonin menjëherë, si të metë mendërisht.

Fundi i llafit nuk ka studime për to!

Ndaj le të kthehemi në burrat e fuqishëm që duan gratë dhe në gratë e pafuqishme për t’ju rezistuar burrave të fuqishëm.

Vetë solidarizohem me të dytat dhe i admiroj. Mendo se si do ishin pa to burrat e shtetit apo edhe nëpunësit e tjerë nga ministrat e deri në drejtorët.

Të pamotivuar!

Me uri seksuale në sy!

Të ç’organizuar!

Prandaj një pjesë e mirë e tyre bëjnë dashuri ose me sekretaret ose me shefet e kabinetit. (Për këtë ka statistika.) Të përgjëruara ato jo vetëm mbajnë shënim çdo gjë të mençur që del nga goja e të fuqishmëve, por dërmohen në punë për të ndjekur imtësisht çdo detaj të ditës së punës së bosit.(Zakonisht ditët e punës së tyre përfshijnë të 24 orët me gjithë gjumë.)

Dhe ku mund të prehet më mirë se në gjoksi me silikon i shefes së kabinetit, pas një dite takimesh intensive me diplomatë, biznesmenë dhe hallexhinj, shefi?

Dhe në ato caste, situatën e merr në dorë ajo- sekretarja ose shefja e kabinetit.

Në fillim e puth, pastaj…