“Atdheu në rrezik”

Kjo ishte parrulla e hedhur nga Stalini, kur gjermanët po i afroheshin dyerve të Moskës, pasi kishin përparuar në mënyrë të rrufeshme mijëra kilometra në brendësi të territorit të Bashkimit Sovjetik. U hapën burgjet për të dënuarit ordinerë dhe u mobilizuan përkrahës të sistemit dhe kundërshtarë të tij, me qëllimin e vetëm, që Moska mos binte në duart e Gjermanëve.

“Shqipëria në rrezik” është parrulla e hedhur nga Sali Berisha dhe që do përcaktojë protestën e lajmëruar të 7 korrikut.

Mund të ketë shumë shqiptarë, të cilët i japin të drejtë Berishës për të protestuar dhe mund të bashkohen me të, pa menduar shumë për sloganin “Shqipëria në rrezik”. Edi Rama e ka tepëruar shumë zullumin! Cmimet janë në qiell, të varfërit janë shtuar dhe korrupsioni ka arritur kulmin. Të rinjtë gjithnnjë e më shumë përpiqen të ikin nga Shqipëria.

Po a është Shqipëria vërtet në rrezik dhe a është Berisha zëdhënësi i duhur për këtë mesazh?

Nëse flasim vërtet për një rrezik që i kanoset Kombit, është ai i shpopullimit për shkak të largimit të vazhdueshëm të njerëzve drejt Perëndimit. Gjithashtu “largimi I trurit” është një tjetër rrezik për të ardhmen e begatë të Shqipërisë. Por këto nuk janë dukuri të sotmet, por të tridhjetë viteve të tranzicionit, kur ka qeverisur edhe Berisha. Madje ai është mesazhdhënësi më I keq për këtë lloj mesazhi, sepse 25 vjet më parë vërtet e futi vendin në situatën më të rrezikshme, që prej vitit 1912.

Berisha ka dhënë prova se nuk i dhimbset as Shqipëria dhe as shqiptarët. E njëjta gjë vlen edhe për Ramën, Metën dhe gjithë politikanët e korruptuar.

Në rrezik janë fëmijët e Berishës,familja Meta-Kryemadhi dhe bashkëpunëtorët e tyre më të afërt. Ndaj duke përdorur protestën dhe ata që i ndjekin nga pas do mundohen t’ju dëshmojnë të huajve, kryesisht amerikanëve, se janë faktor politik që nuk mund të injorohen. Këtë e dinë dhe shumë nga ata që do i pasojnë në protestën e 7 korrikut, por që mendojnë ngushtë “Le t’I shfrytëzojmë për t’I tundur këmbët Ramës, pastaj i largojmë“. Berisha u rikthye jo për tu larguar, por për të ndenjur deri sa të garantojë që nuk i preken fëmijët. Cilido që e ndjek gënjen mendjen se po ndihmon vendin dhe fëmijët e vet.

Parrulla e 7 korrikut duhet të jetë:

“Zeni dhe Argita në rrezik! – Eja dhe ti me ne!”