Hajdutët gjithnjë kërkojnë kohë

Koha është një faktor shumë i rëndësishëm për hajdutët. Sa më shumë kohë të kenë aq më shumë vjedhje kryejnë dhe sa më shumë kohë të kenë për një vjedhje të caktuar, aq më spektakolare do e bëjnë. Por për ta koha është një aleat i domosdoshëm edhe kur kapen. Sa më shumë kohë të kalojë në proceseet gjyqësore aq më e mundshme është që krimet e tyre të harrohen, një pjesë të parashkruhen dhe indinjata e publikut ndaj tyre të zbutet dhe kjo të bëjë ose të dalin të pafajshëm ose të marrin një dënim minimal.

Ky është një parim universal, por më i rëndësishëm bëhet në vende me institucione juridike të dobëta si vendi ynë. Ngjarjet vetëm të kësaj jave dëshmojnë se sa i favorizon koha hajdutët.

Saimir Tahiri, i anatemuar në mediat shqiptare dhe të huaja si ministër i lidhur me trafikantët e drogës, pas më se katër vitesh ka të ngjarë të dalë përfundimisht i pafajshëm. Ndonëse nuk ka qënë vetëm koha që e ka favorizuar, sepse kryesore ka qënë ndihma që ka marë nga Rama dhe segmentet e drejtësisë të ndikuara prej kryeministrit, përsëri edhe koha e ka bërë të saj se askush nuk po kërkon më një dënim shembullor për një ministër paturpësisht hajdut dhe trafikant.

Sa më shumë kohë po kërkojnë edhe dy familjet hajdute Berisha dhe Meta, të përballura tashmë jo me sistemin e drejtësisë, por me vendosmërinë amerikane për t’i shpënë para gjyqeve. Janë të dy palët në pozita identike edhe pse “hajninë“ e kanë bërë të ndarë dhe jo në grup.

Berisha shpreson që të shtyjë sa më shumë kohë duke qënë “faktor” i opozitës për t’ju treguar amerikanëve që ka mbështetjen më të madhe në elektoratin kundër Ramës. Me këtë shpreson që amerikanët mos ngulmojnë në hapjen e proceseve ndaj fëmijëve të tij dhe nëse do ndodhë një ndryshim i mundshëm i administratës amerikane më 2024, çështja e tij të lihet në harresë.

Hajduti Meta s’ka asnjë shpresë tjetër veç të mbrohet me “pasuritë e tij” dhe me Berishën. Ndaj dhe shpalli zgjedhjet e pjesshme, kur kishte vite që nuk i shpallte sepse i quante jo të ligjshme zgjedhjet e fundit vendore. LSI as ka ambicie për këto zgjedhje as kandidatë, por i shpalli për të ndihmuar Saliun që të marrë në kontroll opozitën dhe kështu edhe çifti Meta-Kryemadhi mund të shpresojë për një stuhi më të dobët amerikane.

Por koha është një aleat edhe i hajdutit Rama. Sa më shumë të zgjatë mbijetesa Berisha-Meta dhe pandëshkueshmëria e tyre, aq më gjatë ai mbetet në pushtet dhe aq më e largët bëhet mundësia për t’i ardhur rradha për të shkuar para drejtësisë. Ajo që e tremb më shumë është një “makroproçes” i ish-qeveritarëve që do sjellë si rrjedhojë një “makroproçes” të tij dhe oborrtarëve të tij.

Koha nuk është aleat i njerëzve të ndershëm dhe të varfër të Shqipërisë, që detyrohen të shtyjnë vitet në skamje ose të mbledhin plaçkat në nj bohçe dhe t’ja mbathin në vendin e parë që mund t’i pranojë.