Sa për mbarë…nga lumi!

Disa orë pasi i nisa via email mesazhin enigmatik, “boboshtarka59” ktheu përgjigjen: “Mbetemi në kontakt!”

Isha tërësisht i papërgatitur për këtë përgjigje. Për më tepër edhe me pikçuditëse në fund. Para një muaji kisha një shkrim “goditës” ndaj shprehjes modern të anëve tona “Mbetemi në kontakt” dhe tani si bumerang m’u përplas në fytyrë. Edhe me pikëçuditëse.

Vetëtimthi i shkova ndërmend të gjitha nëntekstet e atij mesazhi nga: “Do të të shkruaj unë kur ta shoh të arsyeshme.”, “Nuk më bëhet vonë për hallin tënd!”, “Kujton se do më zbërthesh kaq lehtë?!”, “Kur të thuash se për ç’lloj valleje e ke fjalën do të të përgjigjem” dhe deri tek më e rënda “Mos më çaj g….n!”

Ja dërgova edhe avokatit tim në Tiranë, për të marrë një mendim më të pjekur ligjor, por ai duke mos dashur të pranojë dështimin e mesazhit “E luan edhe ti vallen e Dobruxhës?” mu përgjigj:

“Për momentin nuk kemi pse të shqetësohemi. Duket që “boboshtarka59” do më shumë kohë dhe ne nuk kemi pse të nxitohemi. Eshtë një hallkë që duhet ta shtrëngojmë fort për të kapur gjithë zinxhirin ligjor të eventit.”

“Eventi” është në Madrevo, unë në Kanada, avokati im në Tiranë dhe nuk kemi idenë e vendndodhjes së “boboshtarka59”.

Gjykata krahinore e Madrevos nuk ka asnjë faqe online për të parë nëse është rregjistruar padia dhe a ka ndonjë datë të seancës së parë. Mlladen Ushkurov është person i vërtetë se ka profil në Instagram dhe një foto me kostum popullor të zonës së Dobruxhës.

Vetëm kaq kam mundur të zbuloj gjatë dy netëve pa gjumë, si dhe të shoh në “googlemap” se nga vijnë rrugët që të shpien në Boboshticë. Janë katër rrugë dhe njëra vjen nga Korça, që presupozohet se ka edhe fluksin më të madh se sjell korçarët, tiranasit, elbasanllinjtë, durrsakët, Kosovarët, grekët, maqedonasit, bullgarët dhe rumunët. Rruga tjetër është ajo që vjen nga Kolonja dhe sjell gjithë shqiptarët jugorë, çamët si dhe grekët e Ballkanit Perëndimor. Rruga e tretë vjen nga Dardha dhe sjell vetëm devollinjtë e sipërm, ndërsa e katërta vjen nga Drenova dhe përdoret kryesisht nga konkurentët e prodhimit të rakisë së manit.

Cilën rrugë të ndjek për të shpëtuar nga padia e Ushkurovëve?

Mos ndoshta duhet të kërkoj ndihmën ligjore të avokates Enida N. Bozheku, avokateja më e famshme në çështjet civile, penale dhe administrative në anët tona?

Kur je në qorrsokak gjithnjë ëndërron për rrugët e drejta që të nxjerrin në bulevard, si kanë qënë të gjitha rrugët e qytetit tim para çlirimit, gjatë çlirimit dhe pas çlirimit.

Tani për tani shtrëngo hallkën – tha avokati im në Tiranë dhe unë po e shtrëngoj.