A ka lidhje prezantimi i projekteve të Stadiumit me fushatën?

 

Më 2 maj në Korçë, krejt rastësisht dhe “pa asnjë lidhje” me fushatën e zgjedhjeve vendore do bëhet prezantimi i disa projekteve finalistë për rinovimin e stadiumit të Korçës. E quaj rinovim edhe pse qeveria dhe vendorët po e shesin për stadium të ri, se në fund të fundit po ndërtohet ekzaktësisht në të njëjtin vend dhe me siguri që do i hiqen pistat e atletikës, ku janë stërvitur dikur me qindra atletë profesionistë, disa prej tyre të nivelit ndërkombëtar. Për fat të mirë është menduar të ndërhyet edhe në Pallatin e Sportit “Tamara Nikolla”, i cili ka mbetur në të njëjtën gjendje që ka qënë kur u përurua 50 vjet më parë.

Deri tani nuk është thënë gjë për koston e përafërt të projektit (gjithnjë ka një buxhet fillestar edhe pse nuk është shpallur projekti fitues), se nga vijnë fondet dhe se kur do hapë dyert stadium për sportdashësit korçarë.  Nënvizohen vetëm “ndërkombëtarët” që nga Juria e konkursit e deri tek “studio prestigjioze”, a thua se deri tani nuk jemi velur në Korçë me këta ndërkombëtarët e Internacionales së Pestë (kështu është e mira të quhet bashkësia e ndërkombëtarëve me të cilët punon për Shqipërinë socialisti Rama.)

Thellësisht besoj se stadium nuk ka për t’u ndërtuar kurrë dhe se e gjithë kjo lojë “stadiumesh të rinj” për Korçën, Vlorën dhe Durrësin është një përpjekje për të kapërcyer gjendjen jo të mirë të sondazheve të zgjedhjeve të ardhme veçanërisht në Durrës dhe Korçë.

E kam këtë bindje se e pashë vjet me sy gjendjen e Pallatit të Sportit, si dhe mungesën e një pishine publike të hapur ose të mbyllur në qytet. Ka pasur në fillimin e viteve ’60 dhe nuk ka 70 vjet më vonë. Grupi Peleshi ka 16 vjet që drejton qyetetin dhe ka bërë nga parqet japoneze, dy kullat e panevojshme dhe plot objekte të tjera të dyshimta dhe nuk e pat vënë ujin në zjarr për restaurimin e Pallatit të Sportit dhe ndërtimin e një pishine për qytetarët dhe nxënësit e shkollave.

Projektet që do paraqiten më 2 maj, do përdoren si një mjet propagandistik për fushatën dhe përgjithësisht janë të efektshme, se krijojnë përshtypjen se po bëhemi njëlloj si Boni apo Goteborgu edhe pse jemi larg tyre. Por nga “e thëna në të bërë na ndan një lumë i gjërë“ dhe po e përsëris që i gjithi ky është një bllof i një qeverie, që nuk e ka të vogël borxhin publik dhe do i hajë premtimet e dhëna si ka bërë për shumë të tjera. Po hiqt edhe mundësia e vjedhjes me metodën PPP, sepse kjo e fundit është kritikuar shumë nga Bashkimi Europian.

Ndaj edhe sportdashësit korçarë të jenë më të ftohtë në ëndërrat e tyre “tani do na heqin dënimin nga UEFA, do kemi dhe stadiumin e ri dhe nuk ka asnjë arsye mos arrimë nivelin e ekipeve të Dortmundit apo të Napolit.” Duhet të jenë edhe të bindur se këto para nuk bien nga qielli po dalin nga xhepat e tyre dhe para se të entusiazmohen nga maketet e stadiumeve dhe videot reklamuese të tyre të nisin të kërkojnë hesap për ato që janë ndërtuar më parë, për ato që nuk janë ndërtuar dhe se sa do kushtojnë këto që mund të ndërtohen.

Rama nuk është Babagjyshi i 2 majit që na sjell dhurata, por një mashtrues i klasit të parë, që po sundon dhe pasurohet vetë, si dhe banda e tij me paratë e taksa paguesve ose me ato që dhurohen nga të huajt për popullin shqiptar.