“Për momentin…”

“Ene aksi ka t’boj, ene numuri i koms…ene momenti!” ishin fjalët e rëndësishme të profesorit tonë të fiskulturës Raq Bushi, kur i kërkonim të na spjegonte nëse ishte e rëndësishme për një futbollist të “klasit” të kishte sa më të madh numurin e këmbës. Prof. Raqi atë kohë mbronte disertacionin dhe ne nuk arrinim të kuptonim nëse e kishte fjalën për momentin si nocion kohor, apo për nocionin fizik të tij. Ndoshta nuk e dinte as Raqi vetë.

Dashje pa dashje më kujtohet kjo “mesele” e shkurtër e kohës së rinisë, kur nga Shqipëria më shkruajnë në mesazh “Për momentin jam jashtë Shqipërisë“, “…jam shumë i zënë për momentin”, “momentalisht nuk e strukturoj dot si proces”, “…çdo gjë do zgjidhet sipas momentit përkatës”, e plot të tjera, ku “Momenti” është i plotfuqishëm.

Konstruktorët, që llogarisin ndërtimet, e dinë se sa të rëndësishme janë momentet e forcave për të kursyer në hekur dhe në shpenzime, por nuk ka agjë më të “fuqishme” se “për momentin” në shqipen e shekullit të XXI. Nuk ka nevojë të thuash më “tani”. “Tani” është arkaike, demode, e pastrukturuar, prozaike, banale, katunareske, antiavanguardiste. Më keq akoma shprehjet “tani për tani”, “në këtë çast”, “sot paradite”, “këtë javë“ etj etj, që janë shqip dhe përcaktojnë qartë se për ç’segment kohor bëhet fjalë.

“Për momentin” është magjik se jo vetëm tingëllon njëkohësisht europiane dhe amerikane, por ka brenda edhe “djallëzinë anadollake” për t’i “lënë gjërat mbytkë“. Se nuk mund ti kërkosh llogari dikujt që të ka premtuar se do të bëjë diçka, as pas një muaji, pasi të ka thënë “…për momentin problemi jot do kalojë në një plan të dytë të evaluimit paraprak”. Se ta ka bërë të qartë! Do duhen të paktën dy deri tre muaj , që “momenti tremujorsh” të arrijë “pjekurinë e evaluimit paraprak dhe situata të bëhet ekzigjente”.

Dhe është thellësisht magjik, se posa më shkrojti një mik, të cilit i kam marrë hua 200 dollarë dhe nuk kam t’ja kthej, ndaj i shkrojta që “për momentin, po angazhohem në një artikull gjuhësor, që do përçojë një diskutim gjithëshqiptar në trevat brenda, jashtë dhe anash Atdheut”. Miku e mirkuptoi dhe më tha, që do më kujtojë pas dy muajsh për borxhin. Nuk e di ku ndodhej “për momentin”.

Tani po e mbyll!

“Për momentin” pirdhuni të gjithë ju dhe momentet tuaja aq të vlefshme!