Rikthehem sërish

Unë kthehem dhe rikthehem atje,

Si një vrasës në vendin e krimit.

Sytë i mbaj ngulur në një pikë,

Pa ditur se ç’pres.

Peng i mendimit,

I mendimit pa llogjikë.

E paarsyeshme është dashuria,

Po njëlloj si vrasja.

Në qiejt e bukur të ndjenjave dehesha,

Thithja të mirën,

                Gëlltisja vesën,

                                Bukurinë qasja.

Tani që ftohtësia e të arsyeshmes,

Më shtyu teposhtë,

Në stalagmitet e zgafellave,

Ku sundon bardhezia e të qënit,

Nuk zbut dot ashpërsinë as me lotë,

Krahëkëputur nuk shkoj dot mbi re.

Diçka të madhe padashur kam vrarë,

Nën çmendurinë e katilit rit,

Kthehem dhe rikthehem

Sërish atje.