I mbylla të gjitha:
Afshet e nxehta në një motel të humbur,
Ecjet mes degëzave që gërvishtnin,
Puthjen drithëruese pranë pemës,
Notat e çmendura të pianos,
Ndërsa bënim dashuri;
Gjarpërimin e rrugës drejt çastit të lumtur,
Ngushtësinë e luginës që të merrte frymën,
Të qëllimtat stonatura,
Gjunjëzimet në të shtratit cep
Me lutjen për pafundësi;
Përgjigjet e ethshme që paraprinin pyetjet,
Zjarrin tek tëmthat,
Të pulpëve fërkime,
Keqkuptimet që nxisnin mëdyshjet
Hovin e erës që më sillte tek ti.
I mbylla në një arkmort letre,
Dhe i nisa me një melodi të përvajshme
Për t’i vendosur në një nga katet e qimitirit,
Tempullit të përjetshëm të dashurive të humbura.
Në kapak vura një pikturë të Klimt-it.
No comments:
Post a Comment